2015-10-15
"Piraten Eguna" izango da bihar Barikuetan Jai programan
Barikuetan Jai, umeekin euskaraz jolasteko programa, bueltan izango da bihar arratsaldeko 17:30etik 19:30era Kultur Leioaren inguruan, hau da, Jose Ramon Aketxe plaza edo Errekalde plazan. Bihar ‘Piraten eguna’ izango da jorratuko den gaia.
Leioako kaleetan ezkutatuta dagoen altxorraren bila arituko gara biharko saioan. Baina altxorra aurkitzeko ezinbestekoa da piraten mozorroa atontzea. Horrela ba, bakoitzak bere mozorroa prestatuko du lehenbizi, ostean partxea jantzi eta prest izango gara altxorra aurkitzeko. Aurkituko ote dugu?
Euskara Zerbitzuak martxan jarritako programa honen helburua da haurrek eta familek euskara erabiltzea herriko plazetan eta kaleetan, eta horretarako ostiralero jarduera bereziak egiten dira euskarazko harreman sareak zabaltzeko eta euskara erabiltzeko guneak eta aukerak sortzeko.